पालघर | प्रतिनिधी
मुंबई–अहमदाबाद राष्ट्रीय महामार्गावरील वाडा–खडकोना परिसरात युनायटेड पेट्रोल पंपासमोरचा बेकायदेशीर (अनधिकृत) कट पुन्हा सुरू करण्यात आल्याचा धक्कादायक प्रकार समोर आला आहे. या कटमुळे वाहतुकीत मोठा गोंधळ निर्माण होत असून अपघातांचा धोका वाढल्याची गंभीर बाब पुढे आली आहे.या संदर्भात “रेझिलेंट इंडिया”च्या सदस्यांनी तात्काळ पुढाकार घेत मनोर पोलीस ठाण्याचे प्रभारी अधिकारी कुमार सुशांत यांना याबाबत माहिती दिली. स्थानिक नागरिकांकडूनही या कटमुळे वारंवार अपघात होण्याची भीती व्यक्त करण्यात आली होती.माहिती मिळताच पोलीस प्रशासनाने या प्रकरणाची दखल घेत संबंधित बेकायदेशीर कट त्वरित बंद करण्याचे आश्वासन दिले आहे.
तसेच भविष्यात अशा प्रकारचे अनधिकृत कट पुन्हा सुरू होऊ नयेत यासाठी आवश्यक ती कारवाई करण्यात येईल, असेही स्पष्ट करण्यात आले.स्थानिकांच्या मते, या कटमुळे वाहनचालक अचानक रस्ता ओलांडतात किंवा चुकीच्या दिशेने वळतात, त्यामुळे महामार्गावरील वेगवान वाहतुकीत अपघात होण्याचा धोका मोठ्या प्रमाणावर वाढतो. विशेषतः रात्रीच्या वेळी ही परिस्थिती अधिक धोकादायक ठरते.प्रशासनाकडून दुर्लक्ष?महामार्गावर अशा प्रकारचे बेकायदेशीर कट तयार होणे ही अत्यंत गंभीर बाब असून, संबंधित यंत्रणांकडून योग्य देखरेख होत नसल्याचे यावरून स्पष्ट होते. अशा प्रकारांवर वेळेवर कारवाई न झाल्यास मोठे अपघात घडू शकतात, असा इशारा स्थानिकांनी दिला आहे.
नागरिकांची मागणीहा कट कायमस्वरूपी बंद करून त्या ठिकाणी योग्य साईनबोर्ड, बॅरिकेट्स आणि पोलीस देखरेख वाढवण्याची मागणी नागरिकांकडून केली जात आहे.“अपघात होण्याआधीच कारवाई करा”रेझिलेंट इंडियाच्या सदस्यांनी प्रशासनाला स्पष्ट इशारा देत, अपघात घडल्यानंतर नव्हे तर त्याआधीच ठोस पावले उचलावीत, अशी भूमिका मांडली आहे. महामार्गावरील नागरिकांच्या सुरक्षेशी तडजोड अजिबात सहन केली जाणार नाही, असा ठाम इशाराही यावेळी देण्यात आला.