पालघर | प्रतिनिधी
पालघर जिल्ह्यातील आरोग्य व्यवस्थेला अधिक सक्षम आणि दर्जेदार बनवण्यासाठी पालघरचे आमदार Rajendra Gavit यांनी 13 एप्रिल रोजी पालघर येथील शासकीय विश्रामगृहात महत्त्वपूर्ण आढावा बैठक आयोजित केली. या बैठकीत जिल्हा रुग्णालय तसेच मनोर येथील ट्रामा केअर हॉस्पिटलच्या कामकाजाचा सखोल आढावा घेण्यात आला.
बैठकीला जिल्हा शल्य चिकित्सक Dr. Ramdas Marhad यांच्यासह संबंधित विभागातील अधिकारी उपस्थित होते. यावेळी येणाऱ्या काळात आरोग्य सेवा अधिक परिणामकारक करण्यासाठी विविध मुद्द्यांवर चर्चा करण्यात आली.
आमदार गावित यांनी गंभीर रुग्णांना वेळेवर आणि योग्य उपचार मिळावेत यासाठी आरोग्य यंत्रणेने अधिक जबाबदारीने काम करावे, असे त्यांनी स्पष्ट केले.
तसेच नविन होणाऱ्या जिल्हा रुग्णालयातील पाणीपुरवठा सुरळीत राहण्यासाठी स्वतंत्र तरतूद (सेपरेट प्रोव्हिजन) करण्याचे निर्देशही त्यांनी दिले. रुग्णालयातील मूलभूत सुविधांमध्ये कोणतीही कमतरता राहू नये, यावर त्यांनी भर दिला.
याशिवाय, CSR (कॉर्पोरेट सोशल रिस्पॉन्सिबिलिटी) अंतर्गत आवश्यक वैद्यकीय उपकरणे (इन्स्ट्रुमेंट्स) उपलब्ध करून घेण्याबाबतही त्यांनी प्रशासनाला सूचना केल्या. खासगी कंपन्यांच्या सहकार्याने आरोग्य सेवेत सुधारणा घडवून आणण्याचा प्रयत्न यामधून दिसून येत आहे.
दरम्यान, जिल्हा मेडिकल कॉलेजसंदर्भातही महत्त्वाची माहिती समोर आली. मेडिकल कॉलेजचे डीन Dr. Mahendra Kurhad यांनी शासनाकडे सादर केलेल्या प्रस्तावाची माहिती दिली. या प्रस्तावानुसार, जिल्हा मेडिकल कॉलेजमध्ये 100 विद्यार्थ्यांची क्षमता, 430 खाटांचे सुसज्ज रुग्णालय आणि सुमारे 692 कोटी रुपयांचा भव्य प्रकल्प उभारण्याची योजना आहे.
या प्रस्तावामुळे पालघर जिल्ह्यातील आरोग्य आणि वैद्यकीय शिक्षण क्षेत्रात मोठी क्रांती घडण्याची अपेक्षा व्यक्त केली जात आहे. स्थानिक रुग्णांना अत्याधुनिक उपचार सुविधा उपलब्ध होण्याबरोबरच विद्यार्थ्यांसाठीही उच्च दर्जाचे वैद्यकीय शिक्षण उपलब्ध होणार आहे.
एकूणच, या आढावा बैठकीतून पालघर जिल्ह्यातील आरोग्य व्यवस्थेला गती देण्याचा ठोस प्रयत्न होत असल्याचे स्पष्ट झाले आहे.
