🌳 जंगल कोणाच्या बापाचे…?खाजगी कंपनीसाठी वनभूमीतून रस्ता — प्रशासन गप्प का…?

पालघर | मयूर ठाकूर

पालघर जिल्ह्यातील आवधणी ग्रामपंचायत हद्दीत मनोर वनपरिक्षेत्रातील वन विभागाच्या जागेत थेट वृक्षतोड करून खाजगी कंपनीच्या जॉब साईटकडे जाण्यासाठी रस्ता तयार करण्यात आल्याचा प्रकार समोर येत आहे. हा प्रकार केवळ बेकायदेशीरच नाही, तर पर्यावरणाच्या मुळावर घाव घालणारा असल्याची तीव्र प्रतिक्रिया स्थानिक स्तरावर उमटत आहे. 🌲🔥

वन क्षेत्र म्हणजे कोणालाही मनमानी करण्याची मोकळी जागा आहे का…? झाडे तोडून, मुरूम टाकून रस्ता तयार होईपर्यंत संबंधित यंत्रणा झोपेत होत्या का…? असा संतप्त सवाल आता ग्रामस्थ विचारत आहेत.
विशेष म्हणजे, एखाद्या सामान्य नागरिकाने वनक्षेत्रात किरकोळ हस्तक्षेप केला तरी तातडीने गुन्हे दाखल करणारी यंत्रणा मोठ्या प्रमाणातील वृक्षतोड व रस्ताबांधणीसारखा प्रकार घडत असताना मात्र मौन का बाळगते…? “मोठ्या कंपनीसाठी वेगळे नियम आणि सामान्यांसाठी वेगळे कायदे” असा दुहेरी निकष तर राबवला जात नाही ना…? अशी शंका व्यक्त होत आहे. ⚖️

वन विभाग, महसूल प्रशासन आणि स्थानिक स्वराज्य संस्था या सर्वांच्या नजरेसमोर हा प्रकार घडला असेल, तर तो अधिकच गंभीर मानला जात आहे. परवानगीशिवाय वनभूमीत प्रवेश, वृक्षतोड आणि रस्ताबांधणी हा थेट कायद्याचा भंग असून, दोषींवर कठोर कारवाई होणे गरजेचे आहे.
पर्यावरणाचा ऱ्हास आणि जंगलांची सर्रास होत असलेली कत्तल ही भविष्यातील मोठ्या संकटाची नांदी ठरू शकते. आज रस्ता बनवला, उद्या बांधकाम उभे राहील आणि परवा संपूर्ण जंगलच गिळंकृत होईल — अशी भीती पर्यावरण कार्यकर्ते व्यक्त करत आहेत. 🌍
आता प्रश्न एकच —
प्रशासन जागे होणार की “कंपनीराज” समोर जंगलांचा बळी देत राहणार…?